Sachin ‘moes tóé uitgetree het’
2012-02-01 09:38
Nieu-Delhi. – Die Indiese kolflegende Sachin Tendulkar moes ná Indië se Wêreldbeker-triomf verlede jaar sy uittrede aangekondig het, glo die voormalige Pakistanse krieketkaptein en veelsydige speler Imran Khan.
“Dit was die beste tyd vir hom om uit te tree.
“Hy is só ’n goeie speler en daar is geen plaasvervanger vir hom nie, maar hy moet die tyd reg kies,” het Khan aan CNN-IBN gesê.
Khan, wat self uitgetree het nadat hy Pakistan in 1992 tot die Wêreldbeker-titel gelei het, meen dit is egter nie nou die tyd vir die kolfmeester om sy uittrede aan te kondig nie.
Veral nie nadat Indië met 0-4 in sy afgelope toetsreeks teen Australië in die stof gebyt het nie.
“As hy (Tendulkar) nou groet, sal dit nie op ’n hoogtepunt wees nie.
“As hy dit na afloop van die Wêreldbeker-eindstryd gedoen het, sou dit op die kruin van sy loopbaan gewees het. Daar is niks groter as dit nie,” het die 59-jarige Khan gesê.
Tendulkar, wat die rekordhouer in toetse en internasionale eendagwedstryde is wat lopies en honderdtalle betref, soek steeds daardie ontwykende 100ste internasionale honderdtal.
Die kolfmeester het die Wêreldbeker op sy tuisveld omhoog gehou, maar bevind hom steeds op 99 honderdtalle nadat hy in die toernooi twee daarvan gemoker het.
Volgens Khan, wat in 88 toetse en 175 internasionale eendagwedstryde gespeel het, is die besluit om uit te tree altyd ’n moeilike een.
“Ek wou op my eie daardie besluit neem en dit nie aan keurders oorgelaat het nie.
“Min sportmanne neem egter die besluit op die regte tyd.”
Volgens Khan is dit ook moeilik om te sê of die tyd nou aangebreek het vir die Indiese strydrosse soos Tendulkar, Rahul Dravid en VVS Laxman, wat almal in hul laat dertigs is, om hul kolwe weg te pak.
Tendulkar het in die afgelope reeks teen Australië 287 lopies in vier toetse aangeteken, terwyl Dravid (194) en Laxman (155) se bydraes met die kolf maar skraps was.
Indië speel vandag en Vrydag in twintig20-wedstryde teen die Australiërs voordat hy in ’n driehoekige reeks teen Australië en Sri Lanka Doer Onder te staan kom.
Tendulkar speel nie blitskrieket nie, maar behoort vir die eendagwedstryde in die Indiese span ingesluit te word.
Vir die jongste sportnuus volg Nuus24Sport op Twitter.
– Sport24
