SA trap klei in laaste 3 toetse in Durban
2011-12-24 09:54
Christo Buchner
Johannesburg – Graeme Smith en sy Suid-Afrikaanse krieketspan sal ontslae moet raak van hul Kersfees-babelas van die laaste paar jaar.
Vir Suid-Afrika se Proteas om aanstaande week hul eerste toetsreeks-oorwinning in drie jaar by die huis te behaal, sal hulle iets moet regkry wat hulle ook nie in hul afgelope drie toetse op Kingsmead in Durban kon vermag nie.
Dit is om as oorwinnaar van die veld te stap – iets wat hy al vergeet het hoe om te doen op daardie veld.
Trouens, Suid-Afrika het sy afgelope drie toetse in Durban sleg verloor.
In 2009 het Australië met 175 lopies gewen, waarna Engeland hom in dieselfde jaar daar met ’n beurt en 98 lopies verneder het.
Verlede jaar het Indië Suid-Afrika op Kingsmead met 87 lopies geklop nadat hy ook enkele dae tevore nog met ’n beurt en 125 lopies slae gekry het teen Smith se span in Centurion.
Sri Lanka kom ook in Durban aan nadat hy aan die ontvangkant was van ’n nederlaag met ’n beurt (en 81 lopies) in Centurion.
Die toerspan sal ook, soos die Indiërs, daardie nare ondervinding wil uitwis deur terug te slaan in die reeks – iets wat in dié stadium uiters onwaarskynlik lyk.
Die laaste twee Kerstoetse in Durban het nie vir die Suid-Afrikaners die geskenk gebring wat hulle graag wou hê nie en dit blyk dat die feestydperk nie goed met Smith-hulle saamspeel nie.
Die laaste keer wat Suid-Afrika ’n Kerstoets in Durban kon wen, was in 2006, toe Indië met 174 lopies afgeransel is.
Dit kan aanvaar word dat dit in hierdie tydperk moeiliker is vir die spelers om op die spel te konsentreer.
Almal het hul gesinne by hulle en deurdat daar ’n Kers-atmosfeer heers, en almal ook Kersdag saam deurbring en geskenke uitgedeel word, is krieket nie so op die voorgrond soos dit behoort te wees net voor ’n toets nie.
- Die Burger