SA snellers gaan baljaar
2011-12-23 12:45
Johannesburg – Die vaart van die Suid-Afrikaanse snelboulers sal een te veel wees vir die Sri Lankaanse kolwers in die tweede kriekettoets wat Maandag op Kingsmead in Durban begin, het Graham Ford, eertydse afrigter van die Proteas en nou die man aan die stuur van die Dolphins, gesê.
Benewens die snelboulers, glo hy die draaier Imran Tahir kan ook op sy tuisveld ’n baie groter impak maak as wat hy tot dusver in die Proteas se toetse gemaak het.
“Hier op Kingsmead is dit die wip en veral die feit dat die draai ‘vinniger’ is, wat hom gevaarlik maak,” het Ford gister aan Sport24 gesê.
“Omdat hy die bal kry om vinniger van die blad af deur te skiet, het die kolwers veel minder reaksietyd om hul houe te speel – en dít is sy groot sukses hier. Hy verras die kolwers met hoe vinnig hy die bal kry om van die blad af deur te skiet.”
Hy verwag wel dat ’n bietjie gras op die blad gelos sal word, maar dit sal beslis nie die “groen mamba” wees soos in die dae toe hy die afrigter van die Natal-span was wat die Windie Malcolm Marshall, asook ’n jong Shaun Pollock en Lance Klusener, in sy geledere gehad het nie.
“Nee, dié blad sal nie só groen wees nie. Wilson (Ngubese, die veldopsigter) het die blad reeds hard gerol en dit is baie ferm. Daarom sal daar heelwat wip wees en sal die bal vinnig deurskiet.
“Jy wil juis eerder vaart as sywaartse beweging van die blad af hê, want in laasgenoemde geval kan die Sri Lankaanse boulers ook gevaarlik wees.
“Hulle het nie juis werklik vinnige boulers nie, maar eerder ouens wat met beweging van die naat af skade kan aanrig.
“Die Sri Lankane hou nie daarvan as die bal keelhoogte verby hulle vlieg nie. Daarom het iemand soos Sanatah Jayasuriya ook gesukkel toe hy hier in die eendagreeks vir ons gespeel het.”
Ford het gesê in die verlede het Morné Morkel ook nie baie sukses op Kingsmead gehad wanneer die blad taamlik baie gras op gehad het nie.
“Met dié dat hy met sy lengte effe kort geboul het, het die bal dikwels vasgesteek op die blad en nie vinnig deurgeskiet nie.
“Ek glo met die blad wat nou fermer sal wees, sal hy nie sommer daardie probleem hê nie.”
Hy voorsien ook nie dat die verwagte reën oor die naweek die voorbereiding van die blad in die wiele sal ry nie.
“Wilson is in elk geval ’n dag of wat voor wat sy voorbereiding betref. Sou dit egter tydens die toets reën, kan dit beteken dat Tahir nie meer so ’n prominente rol sal speel as wat die geval sou wees indien dit sonskynweer is en hy veral op die laaste paar dae tot sy reg sou kom nie.”
- Volg Nuus24Sport op Twitter
- Die Burger