SA 'oues' kook in Engeland
2011-04-18 20:00
Rob Houwing
Kaapstad – Hulle is dalk almal aan die verkeerde kant van 35, maar verskeie voormalige Protea-spelers blink steeds uit in Engeland se graafskapkrieket.
Claude Henderson, Andrew Hall en Dale Benkenstein het almal uitgeblink in die tweede ronde van vanjaar se vierdag-graafskapkampioenskappe in Engeland.
Benkenstein (36), ‘n voormalige kolwer van die Dolphins wat 23 eendag-wedstryde vir die Proteas gespeel het, het gemengde geluk gehad toe sy span, Durham, Yorkshire met 146 lopies geklop het op Headingly. Hy het in die eerste kolfbeurt ‘n nulletjie aangeteken, maar in die tweede 150 lopies opgestapel.
Hy het egter in die eerste ronde teen Hampshire 118 en 55 n.u.n. aangeteken.
Hall, die taai veelsydige speler wat binnekort 36 word, het ‘n goeie 146 lopies gemoker toe sy span, Northamptonshire, waarvan hy ook die kaptein is, Kent met ‘n beurt en 159 lopies geklop het.
Die mees verrassende punt van die Suid-Afrikaanse spelers se vertoning in die tweede ronde was moontlik dié van die linksdraaier Claude Henderson (38) se hardnekkigheid as stertkantkolwer vir Leicestershire.
Al het sy span met ‘n beurt en 32 lopies teen Derbyshire, vir wie die Suid-Afrikaans-gebore Wayne Madsen 106 lopies aangeteken het, het Henderson vasgebyt en 77 van sy span se 230 lopies opgestapel in die eerste beurt en in die tweede 40 n.u.n. geslaan.
In die vorige wedstryd het hy teen Glamorgan, wat deur Alviro Petersen gelei word, weer die toporde-kolwers op hul neuse laat kyk met ‘n telling van 80 n.u.n. in sy span se totaal van 238.
Petersen het sy waarde in daardie wedstryd bewys deur 91 lopies aan te teken in sy span se totaal van 146.
- Vir die jongste sportnuus, volg Nuus24Sport op Twitter