SA kolwer voor reeks geskors
2009-12-08 07:29
Eduan Roos
Johannesburg - Hashim Amla, die lopiemasjien van die Suid-Afrikaanse krieketspan is gister op die vingers getik ná ’n misstap tydens ’n onlangse wedstryd teen die besoekers.
Amla het sy misnoeë te kenne gegee toe die skeidsregter Brian Jerling hom uitgegee het in die oefenwedstryd verlede maand tussen die toerspan en Suid-Afrika A in Potchefstroom.
Die Engelse het dié wedstryd met 4 paaltjies gewen nadat Amla, wat kaptein was van die land se naasbestes, vir 37 lopies deur Andrew Strauss op vlak-middebaan uitgevang is van die boulwerk van Luke Wright.
Volgens adv. Michael Kuper, hoof van Krieket Suid-Afrika (KSA) se tugkomitee, sal Amla nie van Donderdag in die Dolphins se SuperSport-kragmeting met die Warriors op Kingsmead in Durban mag speel nie.
Hoewel Amla vroeër deur die Protea-bestuur vrygestel is vir dié kragmeting, gaan hy die nasionale oefenkamp vir die toetsgroep van dieselfde dag in Potchefstroom bywoon.
“Dis ’n ernstige oortreding, aangesien dit tydens ’n toerwedstryd gebeur het en hy (Amla) boonop die kaptein was en veronderstel was om ’n voorbeeld te stel,” het Kuper gesê.
“Amla het tot dusver ’n vlekkelose rekord gehad, hy het nie skuld ontken nie en reeds verskoning gevra vir sy optrede. Daarom is hy net vir een eersterangse wedstryd geskors en is geen boete opgelê nie.”
Intussen lyk Jacques Kallis se kanse om betyds te herstel vir die eerste toets, wat op 16 Desember in Centurion begin, ál skraler. Dié veelsydige ster het die Proteas se kitsreeks teen Engeland weens ’n gebreekte rib misgeloop.
“Sy vordering verloop volgens plan, maar die kans is steeds 50/50 dat hy betyds reg sal wees,” het Mickey Arthur, Protea-afrigter, aan Sport24 gesê.
Dít beteken dat Alviro Petersen sy toetsbuiging kan maak as Graeme Smith se aanvangsmaat, met Ashwell Prince wat na die middelorde geskuif sal word.
Prince het in die Proteas se laaste toets, in Maart op Nuweland teen Australië, die beurt saam met Smith begin en 150 lopies aangeteken. Hy is goed op dreef in die SuperSport-reeks en sal saam met Paul Harris en Makhaya Ntini, hul terugkeer in die toetsreeks maak.
Volgens Arthur sal Dale Steyn wel speel nadat hy die Suid-Afrikaners se laaste twee eendagwedstryde weens ’n ligte dyspierbesering misgeloop het.
- Sport24