Rusty Theron wys sy staal
2010-10-28 08:47
Aboe Dhabi - Vergeet maar van die handvol ander aanspraakmakers op die rol van Proteas-doodsnikbouler in aanstaande jaar se Wêreldbeker-toernooi – Rusty Theron het dít Woensdagaand sy eie gemaak.
Theron (4/27) se drie paaltjies in vier aflewerings in die laaste van Pakistan se toegelate 20 boulbeurte het dié span tot ‘n skamele 120/9 beperk in die tweede twintig20-wedstryd tussen dié lande.
Waar die Pakistanse kolwers eergisteraand grootliks vir hul eie ondergang verantwoordelik was, was dit gister ’n kliniese boul- en veldwerkvertoning deur die besoekers wat Pakistan krytvloer toe gestuur het.
Shahid Afridi en sy span het die tweede agtereenvolgende aand geen antwoord gehad nie op Lonwabo Tsotsobe (2/20) se onwrikbare lyn en lengte, Morné Morkel (1/22) se vaart en wip en Johan Botha (0/17) se slim afwisseling.
Theron het boonop ’n terugvegpoging in die doodsnikke deur Misbah-ul-Haq (33 lopies, 38 balle, 2x4, 1x6) en Zulqarnain Haider (17, 17b, 1x4) nek omgedraai deur albei dié kolwers én Umar Gul (0, 1b) binne die bestek van vier aflewerings kleedkamer toe te stuur.
Graeme Smith (38, 28b, 4x4) en Loots Bosman (11, 16b, 2x4) het die Proteas-lopiejaagtog flink afgeskop teen ’n omgesukkelde Shoaib Akhtar (0/18) en Gul (0/16) en Suid-Afrika was teen spertyd op 72/3 ná 14 beurte – en op koers na ’n reekssege met 2-0.
Selfs beter nuus vir die Protea-bestuur is dat Morkel die laaste van sy roes afgeskud het ná byna drie weke op die krukkelys weens ’n enkelbesering.
Dié hemelbesem het in die eerste blitswedstryd met sy ritme gesukkel en twee foutballe afgestuur, maar gisteraand was hy vir die grootste deel van sy boulskof haas onspeelbaar.
“Morné was uitstekend en ons almal was baie verlig dat hy sonder enige voorval deur sy boulbeurte kon kom,” het Botha agterna gesê.
“Hy is ’n uitmuntende speler en mens kon vandag sy reuse-bydrae sien nadat hy aanvanklik lekker verroes was in die eerste wedstryd.”
Volgens Botha hou die span nou asem op dat nóg twee van die giftigste pyle in die Proteas-koker, Dale Steyn en Jacques Kallis, hul opwagting in die eendagreeks maak.
Steyn, wat ernstige harsingskudding opgedoen het in die onlangse Kampioeneliga in Suid-Afrika, het reeds van ’n volle aanloop begin boul en behoort straks reeds sy terugkeer te maak wanneer die eerste van vyf kitswedstryde môreaand hier plaasvind.
Kallis kolf reeds geruime tyd, maar die afrigter, Corrie van Zyl, kan besluit om langer te wag voordat Kallis ook met die bal ingespan word.
Bly op hoogte van al die jongste sportnuus deur Nuus24Sport op Twitter te volg.
- Sport24