Rekords skeel Jacques min
2011-11-20 07:57
Johannesburg – "Jong ja, as jy so lank speel soos ek, dan moet jy maar seker een of ander tyd sulke rekords kan kry.”
Die beskeie manier waarop Jacques Kallis dít met ’n glimlag sê, is inderdaad opreg.
As jy so na hom sou kyk sonder om te weet dit is een van die kolosse van wêreldkrieket wat hier voor jou sit, sal jy nooit uit sy houding en lyftaal kon agterkom dat hy nou een van net vier kolwers in die geskiedenis van toetskrieket is wat meer as 12 000 lopies aangeteken het nie.
Maar dis nou maar hoe hy is en hoe hy sy krieket speel. Sonder enige tierlantyntjies.
Hy skroom ook nie om jou te laat weet dat jy dit altyd as ’n voorreg moet beskou om vir jou land te kan krieket speel, en nie as jou reg nie.
Die 54 wat hy Donderdag hier op die Wanderers in die Suid-Afrikaanse eerste beurt geslaan het, het sy totaal in sy 147ste toets tot 12 003 geneem.
In die proses het hy ook vir Brian Lara van die Wes-Indiese Eilande verbygesteek op die lys van voorste lopiemakers.
Lara was in die vierde plek met 11 953 lopies in 131 toetse.
Indië se Sachin Tendulkar is voor in die koor met 15 048 (182 toetse), gevolg deur sy landgenoot Rahul Dravid met 12 860 (158 toetse) en die Aussie Ricky Ponting (12 495 in 156 toetse).
Dis eintlik ironies dat iemand wat al soveel rekords syne gemaak het, erken dis nie iets waaraan hy hom steur nie.
“Ag wat, ek sal seker eendag gaan sit en tot die besef kom dit is seker iets besonders, maar nou beteken dit regtig nie vir my iets nie. Ek geniet dit net om krieket te speel en kompeterend te wees en my beste te lewer.
“Wat daarmee saamgaan, is vir my bysaak. Rekords is nog nooit iets wat my gepla het nie. Dit amuseer my altyd as mense so opgewonde raak oor rekords.
“Ek is maar net te bly ek kan nog krieket speel en dat ek dit steeds geniet. Daarom het ek nog nie eens daaraan gedink om uit te tree nie.
“Solank die genot en die opwinding in die spel nog daar is vir my, koester ek nog nie idees van klaarmaak nie.
“Ek word nog soggens wakker en kry daardie spesiale gevoel van opwinding oor die dag se krieket wat voorlê. Dis daai tinteling wat deur jou are bruis wat jou aan die gang hou.”
Sy gunsteling-toetshonderdtal by steeds daardie eerste een van hom in Melbourne in 1996 teen Shane Warne en Kie., toe hy ’n oorlewingstryd gelei het.
Suid-Afrika se voorste kolwer van alle tye – volgens die rekordboeke met sy 40 toetshonderdtalle, die naasmeeste ná Tendulkar se 51 – is inderdaad soos die profeet wat nie in sy eie land geëer word nie.
Omtrent al wat ’n “kenner” is en wat skaars die verskil tussen die voor- en agterkant van ’n kolf ken, het hulle nou al uitgelaat oor Kallis se kolfwerk.
Hy kolf kwansuis te stadig en “kolf net vir sy eie gemiddeld”. As jy in sy kolf-kokon ingaan, maak niks glo vir hom saak nie, nie eens wat in die belang van sy span is nie.
Al sê Kallis hy steur hom nie aan al dié snert nie, is dit byna ondenkbaar dat een van die heel grotes se vermoë so in twyfel getrek kan word.
Jacques Henry Kallis verdien dit nie – en wanneer hy eendag gaan stilsit en inneem wat hy in sy luisterryke loopbaan vermag het, sal selfs hý sy kop inskiklik moet skud.
Vir dié beskeie man sal dit dalk moeiliker wees om te doen as om boulers te kasty.
Vir die jongste sportnuus volg Nuus24Sport op Twitter
– Sport24