Proteas wil vroeg toeslaan

2013-02-04 08:32

Johannesburg – Die Proteas is vol vertroue dat hulle Maandag die eerste toets teen Pakistan sal wen, ten spyte van Misbah-ul-Haq en Asad Shafiq se terugvegpoging.

Shafiq en Misbah het Pakistan tot 183-4 gedra teen uitskeityd op dag drie van die eerste toets. Pakistan het nog 297 lopies nodig om te wen.

Misbah was op 44 en Shafiq het 53 aangeteken. Die nuwe bal sal egter in vyf boulbeurte beskikbaar wees, wat die Proteas se boulaanval weer aansienlik kan versterk.

“Geen span het al meer as 400 lopies in die vierde beurt op hierdie kolfblad geslaan nie en ons dink nie hulle sal dit regkry nie,” het AB de Villiers ná uitskeityd gesê.

“Die kolfblad speel al beter en die bal beweeg nie meer so baie soos wat dit op die eerste twee dae gedoen het nie, maar ons het nog ‘n nuwe bal en ons hoop dat dit dinge 'n bietjie sal bespoedig.”

De Villiers verwag dat die Proteas se boulaanval sommer vroeg Maandagoggend al 'n verskil sal maak.

“Pakistan sal hoop om die nuwe bal sonder verliese te trotseer en om dan in 20 tot 30 boulbeurte weer positief te wees. Ons is bewus daarvan. Hopelik kan ons die wedstryd teen middagete in die sakkie hê.”

Graeme Smith het vroeër Sondag op 275/3 verklaar en aan Pakistan 'n teiken van 479 lopies gestel.

– Volg Nuus24Sport op Twitter.
 

- AP