Proteas verlep ná skittervertoning deur Petersen
2010-02-14 12:44
Kolkata – Suid-Afrika het vinnig hul paaltjies verloor ná 'n kragtoer deur die debuutspeler Alviro Petersen en Hashim Amla wat elk Sondag 'n hondertal geslaan het in die tweede en finale toets teen Indië.
Suid-Afrika was 266-9 in die eerste beurt toe die spel as gevolg van slegte lig beëindig is op die openingsdag van die toets. Die Proteas het sewe paaltjies vir 32 lopies verloor n
á teetyd.
Petersen het geskitter deur 100 lopies aan te teken en Amla was nie uit nie op 114.
Die Proteas het vir die tweede keer in die reeks die loot gewen en was teen teetyd by 228-2 op die openingsdag by Eden Gardens in Kolkata voordat dinge begin skeefloop het.
Petersen en Amla het die goeie kolftoestande benut en het 209 lopies vir die tweede paaltjie tot die telling bygevoeg nadat Graeme Smith in die derde boulbeurt uitgeboul is.
Smith, wat gekies het om ten spyte van ‘n gekraakte vinger in die belangrike toetswedstryd te speel het vier lopies aangeteken voordat hy deur Zaheer Khan skoongeboul is.
Petersen het op die nippertjie ‘n kans gekry om in sy eerste toets te speel toe Mark Boucher weens rugspasmas nie kon speel nie.
Hy het homself met ‘n indrukwekkende honderdtal en 16 grenshoue bewys.
Die 29-jarige kolwer van Port Elizabeth is maar net die derde Suid-Afrikaner, naas Andrew Hudson en Jacques Rudolph, wat in sy debuutwedstryd ‘n honderdtal aangeteken het.
Hy het al 10 internasionale eendagwedstryde gespeel en handhaaf ‘n gemiddeld van 48.85 lopies.
Kort ná sy honderdtal is Petersen van Zaheer Khan se boulwerk deur paaltjiewagter Mahendra Singh Dhoni uitgevang.
Suid-Afrika hoef net gelykop te speel om die titel as die wêreld se top toetsspan by Indië oor te neem.
- Sapa