Proteas teen die toue
2011-12-28 10:03
Durban. – Nóg ’n Suid-Afrikaanse kolfineenstorting het dié krieketspan se harde werk in die eerste toets teen Sri Lanka ongedaan gemaak én die glans van Marchant de Lange se rekord-boulvertoning gister hier laat verdof.
Só het ’n teleurgestelde Hashim Amla erken. Hy was die enigste kolwer wat op Kingsmead kon hond haaraf maak in die Proteas se karige eerste beurt van 168 op die tweede dag van die tweede toets.
Die tuisspan het sy laaste 7 paaltjies vir net 65 lopies verloor en is reeds ’n yslike 177 agter die besoekers – op ’n kolfblad wat ál meer onvoorspelbaar raak.
“Ek wens ek het geweet waarom ons weer só swak gekolf het, want dan sou ons nie in dié benarde posisie gewees het nie,” het Amla gesê.
“Die span is bitter teleurgesteld, veral nadat ons so goed gedoen het in Centurion en Marchant-hulle so goed geboul het.”
Die tuisspan is met 1-0 voor in die reeks van drie toetse nadat hy die eerste kragmeting op SuperSportpark met ’n beurt en 81 lopies gewen het. Tog veg hy vandag om oorlewing op dieselfde kolfblad waarop De Lange se boulsyfers van 7/81 vroeër van hom die Suid-Afrikaanse bouler gemaak het met die derde beste ontleding in sy eerste toets.
Danksy Amla se 54 en sy vennootskap van 76 lopies om die vierde paaltjie met AB de Villiers (25) het die span boonop ’n reuse-tree nader gegee aan ’n eerste reekssege in sy agterplaas in meer as drie jaar.
Dít nadat Jacques Rudolph (7) se stormagtige tweede huwelik met die toetsspan voortgeduur en twee SA swaargewigte, Graeme Smith (15) en Jacques Kallis (0), boonop binne nege aflewerings uitgehaal is.
Die Kingsmead-kolfblad het egter in ’n oogwink van bondgenoot na begraafplaas verander, toe De Villiers én Amla kort ná die teetyd die aftog geblaas het.
“Ons het nie naastenby so goed aangepas by die toestande as wat ons moes nie en ’n paar van ons het ons paaltjies goedkoop weggegee. Ons gaan egter nie net probeer om die toets te red (met ’n onbesliste uitslag) nie, want daar is nog soveel tyd oor dat daar ’n uitslag sál wees,” het Amla gesê.
Dale Steyn se vennootskap met die stertkant-kolwers Imran Tahir (11) en De Lange (9) – wat Suid-Afrika gered het van die vernedering van ’n opvolgbeurt – was boonop ’n sielkundige hupstoot, meen dié KwaZulu-Nataller. “Paaltjies is nou ál wat gaan help en as ons môre vroeg kan toeslaan en daarna ons kolfwerk kan regruk, kán ons nog wen.”
* 195 is Suid-Afrika se gemiddelde eerstebeurt-telling in sy laaste vier toetse op Kingsmead.
* 29% van die Proteas se 168 lopies is gister deur die stert-kolwers Dale Steyn, Imran Tahir en Marchant de Lange aangeteken.
Vir die jongste sportnuus volg Nuus24Sport op Twitter.
– Sport24