Proteas slaggereed vir PE-stryd

2013-01-11 07:11

Port Elizabeth – Graeme Smith, die Suid-Afrikaanse kaptein, het Donderdag gesê sy span is oorgehaal om die uitklophou te plant wanneer hulle Vrydag op St. Georgepark teen Nieu-Seeland te staan kom.

Hy het ook gesê hy is nie té bekommerd oor die afwesigheid van die naatbouler Vernon Philander nie, het Sport24 berig.

Die keurders het besluit om die 27-jarige Kapenaar, wat in die eerste toets in Kaapstad sewe paaltjies geneem het, te laat rus sodat hy ten volle van 'n dyspierbesering kan herstel.

Sy plek word ingeneem deur Rory Kleinveldt, wat einde verlede jaar ’n nagmerrie beleef het in sy debuuttoets teen Australië in Brisbane toe hy 21 paaltjielose boulbeurte op die Gabba afgestuur en 97 lopies afgestaan het.

Hy het egter in die volgende toets in Adelaide vier slagoffers geëis.

“Rory het baie geleer uit sy vuurdoop in Brisbane en die manier waarop hy teruggeveg het in Adelaide,” het Smith gesê.

“Hy weet nou waaroor toetskrieket gaan en hy het dié keer oorgenoeg tyd gehad om homself ordentlik voor te berei.

“Hy het vantevore uitstekend geboul vir die Cobras op St. Georgepark.

“Trouens, ek dink hy het waarskynlik al meer krieket hier gespeel as die res van die span saam!”

– Lees hier meer.

– Volg Nuus24 op Twitter.