Proteas seëvier oor Indië
2010-02-09 13:44
Nagpur - Die Proteas het die eerste kriekettoets teen Indië as gevolg van vernietigende boulwerk oortuigend in Nagpur gewen.
Suid-Afrika het met 'n beurt en ses lopies gewen nadat hulle Indië vir 319 lopies almal in hul tweede beurt uitgeboul het.
Dale Steyn het 10 paaltjies in dié wedstryd geneem.
Vroeër het Paul Harris toegeslaan en twee vinnige paaltjies voor middagete geneem.
Teen teetyd was Indië se telling, 223 lopies vir die verlies van 6 paaltjies.
Sachin Tendulkar se uitstekende 46ste toetshonderdtal het landswye feesvieringe tot gevolg gehad, maar Harris het harte gebreek toe hy kort daarna van Tendulkar ontslae geraak het.
Die Tendulkar-paaltjie het Suid-Afrika so laat feesvier dat AB de Villiers vir Harris omgestamp het en in die proses moes die 31-jarige tydelik die veld weens 'n enkelbesering verlaat.
Harris se boulwerk was wêreldklas en akkuraat terwyl Wayne Parnell ook puik op die derde dag vertoon het.
- Sport24