Proteas seëvier in Perth

2012-12-03 11:05

Kaapstad – Die Proteas het hul posisie bo-aan die toetsranglys behou deur Australië in die derde en beslissende toets op die Waca in Perth te klop.

Suid-Afrika het Maandag met 309 lopies gewen nadat hulle 'n reuse-wenteiken van 632 aan die tuisspan gestel het.

Selfs Ricky Ponting, wat deur 'n erewag deur die Suid-Afrikaners ingewag is, se laaste verskyning in 'n toets kon nie die feit verbloem dat die Proteas op pad was na 'n oortuigende oorwinning in Perth nie.

Ponting was nie lank op die veld voordat hy vir agt lopies deur Robin Peterson uitgeboul is nie.

Die Proteas spog nou met twee agtereenvolgende reeksoorwinnings oor die Aussies in Australië.

Australië het briljant gespeel op die eerste dag van die eerste toets in Brisbane en het deurgaans domineer, maar Faf du Plessis het die beurt van sy loopbaan in Adelaide gespeel om Suid-Afrika van 'n gewisse nederlaag in die tweede toets te red.

En in Perth was die beste toetsspan in die wêreld in 'n klas van hul eie.

Vir die jongste sportnuus volg Nuus24Sport op Twitter.

– Nuus24