Proteas sal nie Kieswetter kry nie
2009-11-13 17:26
Londen – Craig Kieswetter, die paaltjiewagter en kolwer van Somerset, het aan die Suid-Afrikaanse krieketkaptein Graeme Smith gesê dat daar geen kans is dat hy van gedagte sal verander om eerder vir die Proteas as Engeland te speel nie.
Kieswetter, wat ‘n Skotse ma het en in Johannesburg gebore is, kwalifiseer nie vir Engeland tot Februarie nie, maar is reeds in die nasionale oefen-span ingesluit.
Engeland het reeds vier Suid-Afrikaans gebore spelers in hul span, met Kevin Pietersen en Jonathan Trott wat beide die drie leeus in hul geboorte land gaan dra in die huidige toer.
Die ander twee spelers, Matt Prior en Andrew Strauss, is beide ook in Suid-Afrika gebore voordat hulle op ‘n jong ouderdom Engeland toe is.
Smith het vroeër in die week ‘n beroep op Kieswetter gedoen om homself aan Suid-Afrika te verbind, maar die 21-jarige het sy verbintenis met Engeland beklemtoon.
“Dit is baie vleiend om te hoor hoe iemand van Graeme Smith se kaliber so hoog praat van my, maar ek bly toevertrou om vir Engeland internasionale krieket te speel en dit bly my ambisie,” het Kieswetter aan Somerset se webwerf gesê.
Brian Rose, Somerset se direkteur van Krieket, het die nuus verwelkom en bygevoeg: “Hy is ‘n baie opwindende vooruitsig en almal by Somerset, van die spelers tot die lede en die ondersteuners, sal bly wees dat hy bly om Somerset te help om verdere sukses te behaal en sal hopelik aanbeweeg om vir Engeland te speel.”
- Sapa - AFP