'Proteas nie só vrot'
2010-12-30 08:05
Durban - Die Suid-Afrikaanse krieketspan was g’n so vrot as wat die telbord in die tweede toets teen Indië sê nie.
Graeme Smith, die Proteas-kaptein, het Woensdag erken sy span se droewige eerste kolfbeurt het hom duur te staan gekom, maar volgehou dat dié kragmeting maklik anders kon uitgedraai het.
Die Proteas het met 87 lopies vasgeval en móét nou in die beslissende toets in Kaapstad seëvier om die reeks te beklink.
Die tuisspan is in sy eerste beurt vir net 131 uitgeknikker en moes Woensdag 303 lopies vir ’n sege aanteken op ’n kolfblad vol wip en vaart en met die toerspan se snelboul-duo, Zaheer Khan en Sree Sreesanth, stewig op dreef.
Hulle kon eindelik net by 215 uitkom, met net AB de Villiers en Ashwell Prince wat enige noemenswaardige bydraes met die kolf kon lewer.
"Ons het die wedstryd reeds op die tweede dag verloor, want dié was nie die soort kolfblad waarop jy vir 131 uitgeboul moet word nie,” het Smith gesê.
“Selfs al kon ons net naby aan hul eerstebeurt-telling kom, sou ons ’n veel beter kans gehad het om te wen.”
Volgens hom is dié nederlaag nie ’n sielkundige knou vir die Suid-Afrikaners nie.
“Indië het uitstekend geboul en beter as ons gevaar in die sleuteloomblikke, maar hulle het self nie juis die wêreld aan die brand gekolf nie.
“Ons kolwers het eenvoudig net te veel los houe gespeel, terwyl ons eerder in dié toestande meer waaksaam moes wees.”Volgens hom is dit terug na die tekenbord voordat die Nuweland-stryd Sondag begin.
“Enigeen van die twee spanne kon vandag (Woensdag) nog wen en ons was boonop ongelukkig dat ’n paar skeidsregterbeslissings nie ons kant toe gegaan het nie,” het Smith gesê, nadat De Villiers én Mark Boucher verkeerdelik been voor paaltjie uitgegee is.
Smith het ook gesoebat dat die skeidsregter-verwysingstelsel eersdaags weer ingespan word.
Dié stelsel, waarvolgens elke span ’n ’n beperkte aantal twyfelagtige beslissings na ’n televisieskeidsregter kan verwys, word nie in dié reeks gebruik nie nadat Krieket Suid-Afrika (KSA) en die Indiese Krieketraad (BCCI) nie daarop ooreen kon kom nie.
“Ek glo die Internasionale Krieketraad (IKR) moet nou verantwoordelikheid neem vir die aanwending daarvan, want dit kan beslis nie aan die onderskeie bestuursrade oorgelaat word nie,” het Smith gesê.
“As hulle wil hê ons moet dit gebruik, dan moet dit in elke reeks ingespan word en nie net elke sesde of sewende reeks nie. Dít bevoordeel niemand nie.”
Volgens hom het die Suid-Afrikaners se plan om die toerspan op ’n hulpvaardige blad te pak ook nie geboemerang nie.“Dis nie asof ons sukkel teen vaart en wip nie, want ons het daarmee grootgeword,” het hy gesê.
“Ons het verwag dat Indië veel beter sou wees as in Centurion, maar ons het net ver benede ons beste gespeel die laaste vier dae.
Gelukkig het ons nie té veel tyd om te tob daaroor nie.
- Sport24