Proteas moet pasop – Mickey
2011-09-28 07:03
Bloemfontein – Mitchell Johnson sal weer ’n bedreiging inhou vir Suid-Afrika se krieketspan, al is daar kritiek oor sy spelpeil, het die voormalige Proteas-breier Mickey Arthur gewaarsku.
Die Australiese toerspanne, wat in Oktober en November in Suid-Afrika speel, word later vandeesweek aangekondig.
Arthur het hom by diegene aangesluit, wat sê Suid-Afrika is net die plek vir Johnson om sy spelpeil te herwin.
“Hy geniet dit werklik om in Suid-Afrika te boul,” het Arthur aan Sport24 gesê.
Johnson was met die Aussies se vorige besoek die toerspan se topbouler met 16 paaltjies in die drie toetse.
Hy het op die onlangse toer in Sri Lanka nie te waffers vertoon nie en net ses paaltjies in die drie toetse geneem.
Die voormalige boulafrigter Troy Cooley, wat gister deur Krieket Australië as waarnemende afrigter vir die toer na Suid-Afrika aangewys is, is dit eens dat die Suid-Afrikaanse speeltoestande Johnson kan help om weer op stryk te kom.
“Ek dink die toestande daar pas die snelboulers en dat die plekke waar ons gaan speel, hulle beslis sal bevoordeel,” het Cooley met sy aanstelling gesê.
Die twee toetse teen die Proteas word beslis in November op Nuweland in Kaapstad en die Wanderers in Johannesburg, waar Johnson hoeka met bal en kolf gedy het.
Cooley, tans nog aan die stuur van die prestasiesentrum in Brisbane, is vanweë sy noue verbintenis met die spelers op ’n tussentydse grondslag betrek nadat Tim Nielsen verlede week as hoofbreier bedank het.
Arthur het die kolwer Shaun Marsh ook uitgesonder as iemand waarvoor Suid-Afrika op die uitkyk moet wees.
Dié toporde-kolwer, wat onder Arthur se afrigting vir Wes-Australië speel, het op die Australiërs se afgelope toer in Sri Lanka sy toetsbuiging met 141 lopies in die tweede toets gemaak.
“Ek is vanselfsprekend bevooroordeeld, maar Shaun is ’n fantastiese speler,” het die gewese Suid-Afrikaanse afrigter gesê.
Arthur maak ook melding van die jong snelbouler Patrick Cummins wat dalk gekies kan word.
Cummins, wat nou vir die NSW-span in die Kampioeneliga speel, is ’n uitstekende vinnige bouler, volgens Arthur.
“Hy is 18 jaar oud en gaan ’n goeie speler word.”
– Sport24
– Bly op hoogte van al die jongste sportnuus deur Nuus24Sport op Twitter te volg