Proteas moet inspring ná slaplê-nederlaag

2013-01-22 07:10

Kimberley – Faf du Plessis, waarnemende kaptein van Suid-Afrika se eendagkrieketspan, het ruiterlik erken die Proteas het slapgelê in die eerste kragmeting met Nieu-Seeland, het Sport24 berig.

Du Plessis het erken dat die tuisspan in die twee oorblywende wedstryde met mag en mening sal moet inspring.

Nieu-Seeland het Saterdag in die Paarl in die eerste eendagwedstryd teen Suid-Afrika vasgebyt en eindelik met ’n enkele paaltjie geseëvier.

"Ons was in die eerste wedstryd ietwat ontspanne. Ons weet nou ons sal baie naby ons heel beste moet wees om hulle te klop, want hulle is ’n gevaarlike eendagspan," het Du Plessis volgens Sport24 gesê.

Du Plessis het gesê hy hoop die blad het ’n bietjie wip en vaart vir die boulers, want stadiger balle pas volgens hom Nieu-Seeland se spelstyl.

“Hopelik is daar iets vir ons in die blad – dit kan met kwaai hitte dalk nie die geval wees nie.”

– Lees hier meer.

– Volg Nuus24 op Twitter.