Proteas mik vir wêreldoorheersing

2012-12-05 07:32

Johannesburg – Graeme Smith en sy Proteas-spanmaats sal mik om hulle voorsprong op die Internasionale Krieketraad (IKR) se wêreldranglys vir toetsspanne te vergroot wanneer hul vroeg aanstaande maand met Nieu-Seeland kragte meet, het Sport24 berig.

Die Suid-Afrikaners het die naweek in hulle toetsreeks teen die Aussies geseëvier, en sodoende hulle posisie bo-aan die toetsranglys behou.

Dié sege beteken Smith en sy span het 123 punte op die telbord – ses punte meer as Engeland (117) in die tweede plek.

Dis die grootste voorsprong in meer as vier jaar.

“Toe ons in 2005 hier met 2-0 verloor het, het dit byna onmoontlik gelyk om ooit in Australië te wen,” het Smith aan Sport24 gesê.

“Om dus twee keer ná mekaar te seëvier, is besonder spesiaal en die trotsste oomblik van my loopbaan.”

“Ons mikpunt is nou om in Januarie teen Nieu-Seeland die volgende tree op dié pad te gee. Ons wil die gaping tussen ons en die res van die krieketwêreld so groot as moontlik maak,” het Smith gesê.

– Lees hier meer.

– Vir die jongste sportnuus volg Nuus24Sport op Twitter.