Proteas maak skoonskip teen Pakistan

2013-02-24 18:40

Centurion – Die Proteas het skoonskip gemaak in die toetsreeks teen Pakistan nadat hulle Sondag die derde en laaste toets op SuperSport-park in Centurion met 'n beurt en 18 lopies gewen het.

Graeme Smith het Suid-Afrika na 'n 50ste toets-oorwinning gelei, die meeste deur enige kaptein.

Pakistan het teen etenstyd op die derde dag 87/2 op die telbord gehad, maar 'n ruk later is die besoekers almal vir 235 lopies uitgeboul.

Die Proteas het 'n opvolgbeurt afgedwing toe hulle Pakistan in hul eerste beurt almal vir 156 lopies uitgehaal het in antwoord op die tuisspan se eerstebeurt-telling van 409.

Die Speler van die Wedstryd was die naatbouler Kyle Abbot wat in sy debuut in die eerste beurt sewe paaltjies vir 29 lopies platgetrek het en Sondag met syfers van 2/39 kon spog.

AB de Villiers is as die Speler van die Reeks aangewys.

Vir die jongste sportnuus volg Nuus24Sport op Twitter.

– Sport