Proteas laat aap uit mou
2010-02-04 10:01
Altus Momberg
Nagpur - Die Proteas se snelboulers gaan straks bloedsweet vir hul paaltjies in die eerste toets wat Saterdag hier begin.
Kepler Wessels, die Proteas se kolfkonsultant en keurder, het gister ná afloop van die oefenwedstryd hier gesê hulle sal eers vanoggend oor die finale samestelling van die span en die boulaanval besluit nadat hulle nóg ’n keer na die plaaslike toestande gekyk het.
“Corrie (Van Zyl, afrigter) het vandag na die blad gaan kyk en dit gaan ’n stadige blad met min wip wees. Dit gaan beslis die draaiers help,” meen Wessels.
Dis regtig moeilik om te weet wat om te verwag van die kolfblad. Daar is nie veel statistieke om op terug te val nie aangesien die komende toets slegs die tweede in die nuwe Vidarbha-stadion net buite die stad is.
Australië het in November 2008 hier vasgeval en dit was ’n wedstryd waarin die draaiers gedy het.
Die Aussie-wegbreekbouler Jason Krejza het 12 paaltjies in die toets laat kantel, terwyl die Indiese draaiers Harbhajan Singh en Amit Mishra saam ook 12 paaltjies geneem het.
Die twee Aussie-blitse, Brett Lee en Mitchell Johnson, het deurgeloop in die toets en die Proteas se vinniger manne gaan hul beste peil bitter vinnig moet bereik.
Die toestande kan egter beteken dat die Proteas met twee draaiers die toets binnegaan. As die keurders egter gaan besluit om Indië met drie blitsboulers – Dale Steyn, Morné Morkel en Wayne Parnell – aan te durf, kan Johan Botha ’n verrassende terugkeer tot die beginspan maak.
Die Proteas het gister die aap uit die mou oor hul spesialis-draaier van voorkeur gelaat toe Botha op nr. 8 teen die Indiese Raadselftal gaan kolf het. Harris is glad nie kolfkans gegee nie.
Dit sal ook interessant wees om te sien wat die Proteas se taktiek gaan wees. Die Indiese media maak ’n groot bohaai oor ’n verwagte opslagbal-aanval deur die Suid-Afrikaners. As die blad egter sulke boulwerk gaan teenwerk, gaan die Proteas beslis ’n Plan B nodig hê.
Die oefenwedstryd het gister onbeslis geëindig met Suid-Afrika wat vir 354 uitgeboul is. Die totaal is effe vleiend vir die tuisspan aangesien Hashim Amla (72*; 168 minute, 122 balle, 12x4) en Jacques Kallis (63*; 69 m, 58 b, 8x4, 3x6) uitgetree het ná goeie vertonings om ander kolwers kans te gee om aan die toestande gewoond te raak.
Gevaarligte het egter ook geflikker vir die Suid-Afrikaners ná ’n ineenstorting teen die Raads¬elftal se draaiers.
Die Proteas het 5 paaltjies vir net 40 lopies verloor nadat AB de Villiers kort voor tee uit is. Dale Steyn het ’n paar reuse-sesse teen die einde geslaan om seker te maak dat die telling darem verby die 350 getrek het.
Wessels was nietemin in sy noppies met die vertoning.
“Ons toporde-kolwers het almal goeie tyd voor die penne deurgebring. Ashwell (Prince) het goed gelyk en sy tegniek was uitstekend,” sê Wessels.
“Ek was ook bly dat JP Duminy goed gekolf en veral dat hy ingekom het teen die draaiers. Dit gaan waarskynlik in die toetse ook gebeur,” meen Wessels.
– Sport24