Proteas kraai koning op Nuweland

2013-01-04 15:17

Kaapstad – Die Proteas het ná middagete op dag drie van die eerste toets teen Nieu-Seeland die Kiwi’s vir 275 lopies uitgehaal om met ‘n beurt en 27 lopies te seëvier.

Die Kiwi’s het na middagete voortgekolf met die telling op 232/5, maar die Proteas het gou ná die pouse begin paaltjies eis.

Vernon Philander het eerste toegeslaan toe hy BJ Watling se paaltjie ná 42 lopies geëis het – sy sesde paaltjie van die wedstryd.

Kort daarna het Philander Doug Bracewell ook terug pawiljoen toe gestuur met geen lopies agter sy naam.

Jeetan Patel was volgende om te stap toe Dale Steyn hom uitgeboul het vir agt lopies.

Hierna was die skrif aan die muur vir die Swart Pette, met Steyn wat James Franklin vir 22 uitgeboul het voordat Chris Martin homself vir ‘n nul uitgehardloop het sonder om 'n enkele bal te trotseer.

Philander is as speler van die wedstryd aangewys vir sy telling van 7 paaltjies vir 83 lopies. Hy het op dag een binne die eerste 45 minute van spel vyf paaltjies geneem en slegs sewe lopies afgestaan en gehelp om die Kiwi’s vir 45 uit te boender in hul eerste beurt.

Die volgende toets begin op 11 Januarie by St George’s Park in Port Elizabeth.

– Vir die jongste sportnuus volg Nuus24Sport op Twitter.