Proteas in beheer

2013-01-11 15:43

Kaapstad – Nieu-Seeland het Vrydagmiddag kort ná middagete op dag een van die tweede toets in Port Elizabeth twee belangrike paaltjies geneem.

Die Proteas het ná die pouse met 'n telling van 99/1 begin voortkolf, en die kaptein, Graeme Smith, het vinnig sy vyftigtal bereik.

Kort daarna het die Suid-Afrikaans gebore Neil Wagner egter vir Smith terug pawiljoen toe gestuur.

Hy is agter die penne deur BJ Watling uitgevang vir 54.

Jacques Kallis het hom hierna by Hashim Amla aangesluit, maar het nie lank gebly voor Doug Bracewell sy tweede paaltjie vir die dag geëis het nie.

Kallis is uit vir agt lopies.

Hierna het AB de Villiers en Amla egter begin vasskop en saam 'n vennootskap van 54 opgestel voordat die spelers vir die teepouse van die veld is.

De Villiers is op 29 lopies terwyl Amla op 69 staan. Amla is vroeër, met sy telling op 48, ‘n tweede kans gegun toe die Kiwi’s ‘n vangkans teen hom verbrou het.

Die Proteas was teen die teepouse op dag een op 191/3.

– Volg Nuus24Sport op Twitter