Proteas hou asem op oor seer Amla
2011-11-29 07:00
Bloemfontein – Die afgelope toetsreeks tussen Suid-Afrika en Australië het ook sy tol onder die Proteas geëis.
Altesaam vyf Aussie-spelers wat in die twee toetse in aksie was, kon nie vir vandeesweek se eerste toets teen Nieu-Seeland oorweeg word nie.
Suid-Afrika het nie heeltemal ongedeerd daarvan afgekom nie. Daar heers ’n mate van kommer oor die kolwer Hashim Amla se voorarmbesering.
Die spanbestuurder, Mohammed Moosajee, glo die Proteas se voorste kolwer in die reeks, wat ’n honderdtal in elke toets aangeteken het, behoort – indien alles reg verloop – betyds te herstel vir die eerste toets teen Sri Lanka.
Die eerste van drie toetse teen die Sri Lankane begin op 15 Desember in Centurion.
Moosajee sê Amla is beseer toe die hotklou-naatbouler Mitchell Johnson hom in die tweede toets op die Wanderers in Suid-Afrika se eerste beurt teen die arm raakgeboul het.
“Dit het ná die tyd baie geswel en ons het hom met pynstillers deur die res van die toets gekry,” sê Moosajee.
“Hoewel die X-straalplate aangedui het daar is nie enige krake nie, het ’n daaropvolgende skandering gewys van die weefsel is beskadig.
“Ons het hom toe as voorsorgmaatreël onttrek aan enige deelname vir sy franchise in die plaaslike eendagreeks.”
Mosajee sê daar sal nie met Amla gewaag word voor die eerste toets nie, mits hulle voel dit is nodig om die besering te beproef.
Alviro Petersen behoort ná sy 190 lopies in die Lions se twee kitswedstryde in die naweek weer betrek te word as Amla nie voldoende herstel nie.
Andrew Hudson, die sameroeper van die nasionale keurders, sê hulle is bewus van Amla se besering.
“Die aanvanklike verslag was dat dit tussen twee en drie weke sal neem om voldoende te herstel.
“Ons hoop hy herstel spoedig,” sê Hudson.
Die keurderbaas het gesê Sri Lanka se meerdaagse opwarmwedstryd in Benoni ter voorbereiding vir die toetsreeks sal nie meer teen ’n volwaardige Suid-Afrikaanse A-span wees nie.
Dit is omdat die wedstryd op dieselfde dag as die Eendagbeker-reeks se eindstryd begin.
“Met twee van ons franchise-spanne wat daardie dag in aksie is, het ons besluit om eerder ’n uitnodigingspan as ’n A-span vir dié wedstryd te kies.”
– Sport24
– Bly op hoogte van al die jongste sportnuus deur Nuus24Sport op Twitter te volg