Proteas hou asem op oor Kallis
2012-11-29 12:41
Perth, Australië – Die Proteas sal die veelsydige Jacques Kallis tot die laaste oomblik kans gee om te bewys dat hy fiks is vir die laaste toets wat Vrydag op die Waca in Perth begin.
Dit het vroeër gelyk asof Kallis die beslissende toets, wat ook sal bepaal wie die voorste toetsspan sal wees, gaan misloop.
Kallis het in die tweede toets in Adelaide 'n dyspierbesering opgedoen en kon dus nie tydens Australië se tweede kolfbeurt boul nie. Kallis het egter 'n belangrike rol gespeel om die wedstryd, wat Maandag geëindig het, te red.
Die Protea-kaptein, Graeme Smith, het gesê die naatbouler Vernon Philander sal terugkeer nadat hy hom weens 'n stywe rug aan die toets in Adelaide onttrek het. Smith het verder gesê hy hoop Kallis sal ook, ten spyte van die kort ruskans, fiks wees.
"Dit beweeg na 'n positiewe lig," het Smith oor albei spelers gesê.
"Ek dink Vernon is gereed en Jacques vorder goed. Ons sal egter moet wag en kyk hoe hy (Kallis) deur vandag en môre-oggend kom.
"Om hom op nommer vier te hê, maak ons sterker met die kolf en is baie belangrik. Hopelik wanneer ons môre-oggend opstaan sal hy gereed wees, maar ons sal nie daardie besluit ligtelik neem nie."
Smith het gesê indien Kallis speel sal hy op nommer vier kolf.
– Volg Nuus24Sport op Twitter
- Sapa - AFP
