Proteas dra oorwinning aan Boucher op

2012-08-20 22:54

Kaapstad – Die Proteas het hul oorwinning in die reeks teen Engeland aan die voormalige paaltjiewagter Mark Boucher opgedra.

Boucher se krieketloopbaan is tydens die reeks kortgeknip toe hy in die eerste wedstryd van die toer deur ‘n dwarsbalkie in die oog getref is. Hy het gevolglik sy uittrede uit internasionale krieket aangekondig.

Die Proteas het Engeland met 51 lopies geklop in die finale toets op Lord’s om die nommer een toetsspan in die krieketwêreld te word. Hulle het die reeks 2-0 gewen.

Die span se kaptein, Graeme Smith, het die oorwinning ná die wedstryd aan Boucher opgedra. Hy het ook “Ons mis jou Bouch” op sy hemp geskryf.

“Dit was ‘n huldeblyk van die span,” het Smith gesê.

“Dit was veronderstel om sy 150ste toets te wees. Hy was vir ‘n lang tyd ‘n integrale deel van die Proteas-familie en dit was iets wat ons as ‘n span gevoel het ons wil doen.”

Boucher het spoedig via sy Twitter-rekening gereageer.

“Dankie @GraemeSmith49, die Proteas-span en vir al die boodskappe van almal! Dit was spesiaal. Trots om deel te kon wees was daardie span,” het hy geskryf.

– Boucher-20120820">Sport24

– Vir die jongste sportnuus volg Nuus24Sport op Twitter