Proteas doen goed in ranglyste
2012-12-04 18:01
Kaapstad – Die Suid-Afrikaanse toporde-kolwer Hashim Amla is net vier punte weg van die nr.1-plek op krieket se toetsranglys vir kolwers.
Die jongste Internasionale krieketraad (IKR) se ranglyste vir boulers, kolwers en spanne is Dinsdag bekendgestel.
Amla het aan die einde van die toetsreeks teen Autralië twee plekke opgeskuif na die derde posisie, met 875 punte na sy reusebeurt van 196 in die derde toets.
AB de Villiers, wat ook ‘n hondertal in die derde toets aangeteken het, het twee plekke opgeskuif na die sewende posisie.
Wes-Indië se Shivnarine Chanderpaul is nou die wêreld se nommer een toetskolwer met Australië se kaptein, Michael Clarke, in die tweede plek.
Dale Steyn is steeds die wêreld se nommer een toetsbouler terwyl Vernon Philander een plek opgeskuif het na tweede, ‘n posisie wat hy met die Sri Lankaan Rangana Herath deel.
Morné Morkel het een plek opgeskuif na sewende.
Jacques Kallis is steeds die wêreld se top veelsydige speler, ten spyte daarvan dat hy nie in die derde toets geboul het nie.
Die voormalige Australiese kaptein Ricky Ponting sluit sy loopbaan af in die 26ste posisie vir toetskolwers.
Vir die jongste sportnuus volg Nuus24Sport op Twitter.
- SAPA
