Proteas boet oor boulwerk

2013-01-20 13:22

Kaapstad – David Miller van die Dolphins is Sondag aangewys as plaasvervanger-kolwer in die Proteas-span vir die res van die eendagreeks teen Nieu-Seeland.

Dít volg nadat AB de Villiers vir twee wedstryde geskors is omdat sy span in die eerste eendagwedstryd teen Nieu-Seeland te stadig geboul het.

Die res van die span is hul wedstrydfooie kwyt as straf vir die stadige tempo waarteen hulle boulbeurte in die wedstryd voltooi het, berig Sapa.

David Boon, wedstrydskeidsregter, het beslis dat die gashere aan die einde van die wedstryd ses boulbeurte minder as hul teiken afgestuur het toe tydtoelatings in ag geneem is.

Die Suid-Afrikaanse kaptein het skuldig gepleit, dus was dit nie nodig vir 'n verhoor nie.

Die Proteas het die wedstryd met een paaltjie verloor nadat hulle 208 aangeteken het – 'n nederlaag wat hulle hul plek op die ranglys gekos het. Die Proteas is nou derde agter Indië en Engeland, wat onderskeidelik in die eerste en tweede plek is.

Faf du Plessis sal in die awesigheid van De Villiers die kapteinskap oorneem.

Die oorblywende twee wedstryde is Dinsdag op die De Beers Diamond Oval in Kimberley en Vrydag op Senwes-park in Potchefstroom. Albei is dag/aand-wedstryde.

– Sport24

– Volg Nuus24Sport op Twitter