Proteas beveilig ná terreuraanval
2010-02-15 06:55
Sapa-AFP
Pune (Indië). – Die veiligheidsreëlings rondom die Suid-Afrikaanse krieketspan is verskerp nadat nege mense dood en 60 beseer is in ’n bomontploffing in ’n restaurant in die weste van Indië.
Hindoe-leiers het Sondag daarop aangedring dat vredesonderhandelings met Pakistan gestaak word na dié aanval.
Die ontploffing eergister was die eerste groot terreuraanval in dié land sedert die Moembaai-slagting van November 2008.
Dit het die Duitse restaurant in die stad Pune, 200 km suidoos van Moembaai, aan flarde geruk. Die bom is in ’n rugsak onder ’n tafel versteek voordat dit om 19:30 in die German Bakery-restaurant, ’n gewilde bymekaarkomplek vir jong Indiërs en buitelandse toeriste, ontplof het.
Dit is naby Chabad-huis, ’n Joodse kulturele en godsdienstige sentrum van die ortodokse beweging Chabad-Lubavitch. Hierdie groep is in die Moembaai-aanval geteiken.
Twee buitelanders, ’n Italianer en ’n Irannees, tel onder die nege mense wat in die jongste aanval dood is. Twaalf van die 60 beseerdes is buitelanders en die res is Indiërs. Die toeriste is onder meer van Iran, Soedan, Taiwan, Duitsland en Nepal.
Die sekuriteitsvlakke in Indiese deelstate en op lughawens is dadelik verskerp
Nasionalistiese Hindoe-leiers blameer Pakistan vir die aanval en het geëis dat die regering volgende week se vredesonderhandelings, wat volg op die aanvalle in Moembaai in November 2008, afstel. Pakistan se regering het nog nie daarop gereageer nie.
Die tydsberekening van die aanval is kritiek, aangesien Indië en Pakistan pas die vorige dag besluit het om die amptelike vredesgesprek te hervat.
In November 2008 is minstens 125 mense dood en 300 beseer toe tientalle jong militantes met outomatiese gewere en handgranate in ’n rubberboot in Moembaai aangekom en oor die finansiële en toeristekern versprei het.
Hulle het ’n voertuig opgekommandeer, op verbygangers losgebrand en wild geskiet by ’n spoorwegstasie, hospitale en die Café Leopold, ’n gewilde kuierplek vir toeriste.
Niemand is nog weens die jongste voorval in hegtenis geneem nie.
- Die Burger