Protea-draaier tree uit
2013-01-08 14:29
Kaapstad – Paul Harris, die voormalige toetsdraaier vir die Proteas, gaan aan die einde van die plaaslike krieketseisoen uittree, het ESPN Cricinfo berig.
Harris, wat 14 jaar lank eersterangse krieket gespeel het, het 103 paaltjies in 37 toetse vir die Proteas geneem.
Sy laaste toets was in 2011 op Nuweland teen Indië, waarna hy uit die span weggelaat is vir die insluiting van die meer aanvallende Imran Tahir.
Harris se loopbaan het in 1998 by die Westelike Provinsie begin, waarna hy in 2002 by die Nashua Titans aangesluit het. Hy kort nog vier paaltjies om 400 eersterangse paaltjies te bereik.
“Ek wil net al die mense bedank wat my in my loopbaan gehelp het, veral vir Richard Pybus, wat die grootste invloed op my gehad het. Ek is seker as dit nie vir hom was nie, sou ek nooit vir Suid-Afrika gespeel het nie,” het Harris tydens ‘n mediakonferensie gesê.
– Lees hier meer.
– Vir die jongste sportnuus, volg Nuus24Sport op Twitter.
