Ponting sal nog toetskrieket speel
2012-02-21 15:14
Sydney – Ricky Ponting, wat weggelaat is uit Australië se eendagspan, het gesê hy wil steeds toetskrieket vir sy land speel, het Beeld Dinsdag berig.
Ponting is Maandag uit die eendagspan vir die volgende twee kitswedstryde in die driehoekige reeks, waaraan Indië en Sri Lanka ook deelneem, gelaat.
"Ek dink ek het aan almal en myself bewys dat ek nog daartoe in staat is om in toetskrieket te domineer, soos wat ek in die afgelope toetsreeks teen Indië gedoen het," het Ponting gesê.
Hy het 'n sleutelrol gespeel in Australië se reekssege van 4-0 oor Indië. Hy het 544 lopies teen 'n gemiddelde van 108.80 aangeteken en in die proses twee honderdtalle en drie vyftigtalle gemoker.
Ponting sê die keurders het hom ingelig dat hy nie meer deel is van hul planne vir die eendagspan nie.
Hy het gesê hy verstaan waarom die keurders die span wil herbou met die oog op die volgende Wêreldbeker-toernooi en dat hy "geensins bitter is oor wat gebeur het nie".
James Sutherland, uitvoerende hoof van Krieket Australië, het hulde gebring aan Ponting en gesê dié kolwer sal onthou word as waarskynlik die land se beste eendagspeler tot nog toe.
Vir die beste sportnuus volg Nuus24Sport op Twitter.
– Sport24