Ponting klaar met toetskrieket
2012-11-29 07:00
Perth, Australië – Die voormalige Australiese krieketkaptein Ricky Ponting het Donderdag sy uittrede uit toetskrieket aangekondig.
Ponting het gesê vandeesweek se stryd teen die Proteas in Perth sal sy laaste een wees.
"'n Paar uur gelede het ek die span laat weet dat die opkomende toets my laaste een sal wees," het hy op 'n mediakonferensie gesê.
Hy het verder gesê hy sal steeds vir Tasmanië speel in die plaaslike kompetisie.
Ponting, wat volgende maand sy 38ste verjaardag vier, het in drie kolfbeurte teen die Proteas in Brisbane en Adelaide gesukkel en die druk neem toe op die veteraan voor Vrydag se toets in Perth.
Hy ewenaar Steve Waugh se mylpaal van 168 toetse in Vrydag se toets – die meeste in die geskiedenis van Australiese krieket.
Ponting, wat 13 336 toetslopies, insluitend 41 honderdtalle agter sy naam het, het gesê dit was tyd om uit te tree.
"Oor die laaste paar weke was my vertoning nie goed genoeg nie. My passie en liefde vir die spel het nie verander nie, maar aan die einde van die dag was die besluit gebaseer op my uitslae.
"Tot dusver in die reeks was my vertonings nie op die vlak wat van kolwers en spelers in die Australiese span vereis word nie."
– Volg Nuus24Sport op Twitter
- AFP
