Ponting, Clarke rig waarskuwing
2011-10-20 07:00
Centurion – Ná Woensdagaand se kitskrieket-ontmoeting tussen Suid-Afrika en Australië is twee dinge duidelik: geen wedstryd is gewen óf verloor voordat Ricky Ponting sy sê gehad het nie; en plant ’n paaltjie op die SuperSportpark-kolfblad en dit sál reën.
Met swaar weerlig en daarna reën is verrigtinge vir langer as drie uur onderbreek en het die Aussies 'n wenteiken van 223 lopies (volgens die Duckworth/Lewis-stelsel) gestel nadat die boulbeurte na 29 verminder is.
Australië het die kragmeting met 93 lopies gewen.
Ponting, die voormalige Aussie-kaptein en veteraan-kolwer, was wéér die groot doring in Proteas-vlees met sy onoorwonne beurt van 40 lopies (55 balle, 7x4) in die eerste van drie eendag-kragmetings tussen dié lande. voordat eers swaar weerlig en daarna reën verrigtinge vir langer as drie uur onderbreek het.
Ponting was nie deel van die afgelope twintig20-reeks tussen dié spanne nie.
Hy het hom vandeesweek by die toergroep aangesluit wat steeds wonder hoe die blitsreeks met 1-1 gelykop geëindig het ná Suid-Afrika se dramatiese sege met drie paaltjies op die Wanderers.
Die 36-jarige Tasmaniër het weliswaar ’n paar benoude oomblikke beleef nadat Warner in net die derde boulbeurt sy bypen verloor het in bewolkte en winderige toestande.
Dié hotklou-mokerman, wat feitlik onstuitbaar was in die onlangse Kampioeneliga in Indië en van wie daar groot gewag gemaak is voor sy Suid-Afrikaanse “safari”, kon vir die derde keer in soveel probeerslae nie die mas opkom teen die Suid-Afrikaanse aanvangsboulers nie.
Hy het agtereenvolgende nulletjies aangeteken in die blitsreeks en kon Woensdag net 20 (17 b, 4x4) aanteken voordat Dale Steyn hom met ’n juweel van ’n aflewering teruggestuur het kleedkamer toe.
Waar Warner gefaal het, het Ponting en sy kaptein, Michael Clarke (29*, 43 b, 5x4), egter geskitter met ’n onoorwonne vennootskap van 75 lopies om die tweede paaltjie.
Die einste Clarke het die Proteas eergister gewaarsku dat Ponting sake moeilik sou maak vir die tuisspan – en hy hét.
Vir die Proteas was die langverwagte terugkeer van Steyn (1/34) minder geslaagd.
Die Phalaborwa Express is ’n welkome ruskans gegun op Nuweland en op die Wanderers, maar het duidelik verroes gelyk in sy vier boulbeurte.
Dit was egter nie net die 12 grenshoue wat Ponting en Clarke saam aangeteken het nie, maar hul vermoë om die veldplasings van die Proteas se waarnemende kaptein, Hashim Amla, te manipuleer en die telbord só aan die rol te hou, wat beïndruk het.
Dit voorspel niks goeds vir die res van die reeks en die twee toetse teen die besoekers aanstaande maand nie.Lonwabo Tsotsobe (0/16) was weer die indrukwekkendste van die Suid-Afrikaanse boulers.
Morné Morkel (0/16), Johan Botha (0/10) en Jacques Kallis (0/20) het met heelwat dissipline geboul, maar sonder sukses.
Die tweede wedstryd vind Sondag in Durban plaas.
– Sport24
– Bly op hoogte van al die jongste sportnuus deur Nuus24Sport op Twitter te volg