Philander wen top-prys
2012-06-06 23:03
Johannesburg – Die Protea-snelbouler Vernon Philander is Woensdag aangewys as die Suid-Afrikaanse krieketspeler van die jaar ná ‘n skouspelagtige begin aan sy toetsloopbaan in die 2011-12-seisoen.
Philander (26) het 51 paaltjies in sewe toetse geneem teen ‘n gemiddelde van 14,15. Hy het ses maal vyf paaltjies of meer in ‘n beurt geneem en het al twee maal tien paaltjies in ‘n wedstryd laat kantel.
Die Cape Cobras-bouler was die hoof-paaltjievraat toe Australië vir 47 uitgeboul is in sy debuut-toets in Kaapstad verlede November. Hy het 5/15 geneem in dié kolfbeurt.
Hy het ook die beste boulgemiddelde gehad van al Suid-Afrika se boulers in al drie toetsreekse waarin hy gespeel het – teen Australië, Sri Lanka en Nieu-Seeland.
Philander, wat ook die toetskrieketspeler van die jaar-toekenning gewen het, het homself bewys as die perfekte vennoot vir Dale Steyn, die wêreld se voorste snelbouler.
AB de Villiers is aangewys as die eendag-krieketspeler van die jaar nadat hy 475 lopies aangeteken het teen ‘n gemiddelde van 158,33 teen ‘n treftempo van 116,13 in sy eerste seisoen as kaptein van Suid-Afrika se eendagspan.
Die kanonkolf-kolwer Richard Levi het die prys vir Twintig20-speler van die jaar ontvang vir sy kolfbeurt van 117 n.u.n. van 51 balle teen Nieu-Seeland in Hamilton.
Hy het wêreldrekords opgestel deur sy honderdtal in slegs 45 balle te behaal en 13 sesse te moker.
Die lys wenners is:
Krieketspeler van die jaar: Vernon Philander
Toetskrieketspeler van die jaar: Vernon Philander
Eendag-krieketspeler van die jaar: AB de Villiers
Twintig20-krieketspeler van die jaar: Richard Levi
Spelers se speler van die jaar: AB De Villiers
Nuweling van die jaar: Marchant de Lange
Uitstaande individuele vertoning: Richard Levi
- Volg Nuus24Sport op Twitter
- AFP
