Philander uit tweede toets

2013-01-08 13:01

Johannesburg – Die Proteas-snelbouler Vernon Philander gaan die tweede toets teen Nieu-Seeland weens ‘n dyspierbesering misloop, het die nasionale span se bestuurder, dr Mohammed Moosajee, Dinsdag bevestig.

Philander het Vrydag in 'n laat stadium van die Proteas se wedstryd die veld verlaat nadat sy dyspier styf geraak het.

Moosajee het gesê die span se bestuur wil nie die risiko loop om Philander se besering te vererger nie, veral nie met die toetsreeks teen Pakistan volgende maand wat wag nie.

“Vernon se dyspier gaan sowat sewe tot 10 dae nodig hê om volkome te herstel,” het Moosajee gesê.

“Met die reeks teen Pakistan wat minder as ‘n maand weg is, is dit nie die moeite werd om dit te waag nie.”

Rory Kleinveldt gaan in Philander se plek ingesluit word, met die veelsydige Ryan McLaren wat ook by die groep gevoeg is as ‘n voorsorgmaatreël.

Die tweede toets begin op 11 Januarie in Port Elizabeth.

– Vir die jongste sportnuus volg Nuus24Sport op Twitter.
 

- SAPA