Philander, Petersen klim op ranglyste

2013-01-07 11:18

Johannesburg – Die Proteas se openingskolwer, Alviro Petersen, het vir die eerste keer die toptwintig op die Internasionale Krieketraad (IKR) se lys van top-toetskolwers bereik.

Petersen, wat verlede week op Nuweland 106 lopies in die Proteas se eerste beurt teen Nieu-Seeland gemoker het, het met 11 plekke geklim na die 20ste posisie op die ranglys.

Hashim Amla is steeds die hoogs-gekeurde Suid-Afrikaanse kolwer. Hy is in die derde plek agter Australië se kaptein, Michael Clarke, en die veteraan Windies-kolwer Shivnarine Chanderpaul.

Jacques Kallis (sesde) en AB de Villiers (sewende) is die ander Proteas in die toptien.

Die snelbouler Vernon Philander is ook besig om die gaping tussen hom en sy spanmaat Dale Steyn te vernou. Steyn is tans die beste toetsbouler in die wêreld, terwyl Philander hard in sy nek blaas in die tweede plek.

Morné Morkel (agste) is ook in die toptien.

Kallis is ook steeds die wêreld se beste veelsydige speler. Shakib Al Hasan van Bangladesj is in die tweede plek.

Die Proteas is ook steeds bo-aan die ranglys vir die beste toetsspan. Engeland is in die tweede posisie.

Suid-Afrika het Nieu-Seeland verlede week met ‘n beurt en 27 lopies verslaan tydens dié twee spanne se eerste toets op Nuweland.

Die tweede toets begin op 11 Januarie in Port Elizabeth.

– Vir die jongste sportnuus volg Nuus24Sport op Twitter.
 

- SAPA