Parnell se IPL-miljoene dalk veilig
2010-03-25 09:59
Johann De Jager
Bloemfontein - Die beseerde Wayne Parnell behoort steeds ’n kitsmiljoenêr te wees, ofskoon hy nie ’n enkele aflewering in die Indiese Premierliga afgestuur het nie.
Dié Proteas-naatbouler van die Oos-Kaap het vandeesweek met ’n liesbesering teruggekeer van Indië waar hy nie in een krieketwedstryd vir die Delhi Daredevils gespeel het nie.
Die vraag is nou wat word van die miljoene waarvoor hy gekontrakteer is.
Parnell het gesê sy agent, Arthur Turner, behoort meer daaroor te weet. Hulle vergader vandag om die kwessie te bespreek.
Turner het by navraag gesê luidens die kontrak behoort Parnell uitbetaal te word, aangesien hy dáár beseer is.
Die 20-jarige Parnell was met die jaarlikse veiling in Januarie in Moembai een van net drie Suid-Afrikaners wat aangekoop is.
Die Deccan Chargers en Daredevils het mekaar gedurende die veiling om die hotklou se dienste opgekeil.
Die bod van meer as R4,5 miljoen is toe op die Daredevils toegeslaan, wat ook die derde hoogste bod op die veiling was.
Parnell is nou in ’n stryd gewikkel om betyds reg te wees vir die Twintig20-wêreldtoernooi in Mei op die Wes-Indiese Eilande.
Hy sal vanoggend ’n spesialis in die Baai besoek om meer duidelikheid omtrent sy regterlies te kry.
Hy is verlede Woensdag in Delhi voor die Daredevils se kragmeting met die Mumbai Indians beseer.
“Dit was met ’n veldwerkoefening voor die wedstryd. Ons moes balle vang.
“Ek het seergekry met my deurvolg toe ek die bal ingegooi het.
Parnell sê dit is baie seer en beslis geskeur.
Hy het nog nooit voorheen las van sy lies gehad nie.
Hy hoop nie ’n operasie is nodig nie.
Uiteraard is hy erg teleurgesteld oor die ontydige besering.
“Dit is maar deel van die lewe,” het hy gesê.
Hy was oorgehaal om sy stempel in die IPL-wedstryde af te druk.
Voor sy vertrek na Indië het hy in die eindstryd van die Standard Bank Pro20-reeks ’n goeie boulvertoning vir die Warriors teen die Lions gelewer.
Hy het toe besonder vinnig geboul. Dit sou interessant gewees het om te sien hoe hy in die IPL vaar.
Parnell sluit hom aan by sy nasionale kaptein, Graeme Smith, van die Rajasthan Royals wat vroeër met ’n vingerbesering teruggekeer het.
Die Proteas se breier, Corrie van Zyl, het gesê hulle is dadelik van Parnell se besering in kennis gestel en dat hulle ook deurentyd op hoogte van sake gehou is.
- Sport24