Pakistanse paaltjiewagter van kontrak gestroop
2010-11-11 10:29
Doebai – Zulqarnain Haider, die Pakistanse paaltjiewagter wat uit vrees vir sy lewe na Londen gevlug het nadat hy geweier het om die uitslag van wedstryde in die kitsreeks teen Suid-Afrika te beknoei, is Woensdag deur sykrieketbase geskors en van sy kontrak gestroop.
Luidens ’n verklaring deur die Pakistanse krieketraad (PCB) het Haider “die bepalings en voorwaardes van sy kontrak verbreek” en is ’n komitee reeds op die been gebring om ondersoek in te stel na sy verdwyning uit die spanhotel en daaropvolgende knoei-bewerings.
Haider het Dinsdag sy uittrede uit internasionale krieket aangekondig.
Hy het aansoek gedoen om beskerming deur die Britse regering, nadat ’n onbekende man hom glo kort voor Vrydag se vierde wedstryd met die dood gedreig het, sou hy nie die uitslag van dié kragmeting en die beslissende een drie dae later help beknoei nie.
Hy het dié skok-onthulling Dinsdag aan ’n Pakistanse televisiekanaal gemaak, nadat hy Maandagoggend vroeg uit die span se hotel in dié stad gesluip het, sonder om sy spanbestuur te verwittig.
Hy het intussen ook gepleit vir die veiligheid van sy gesin in Lahore.
Luidens dié verklaring kon die PCB, ondanks verskeie pogings, steeds nie met Haider praat nie.
Sy kontrak beloop glo nagenoeg R4200 per maand.
Hy is glo aangesê om ’n prokureur aan te stel, maar hy kan dit glo nie bekostig nie, aangesien hy met net sy dagtoelae vir die reeks teen Suid-Afrika oor die weg moet kom.
Ifthikab Alam, die Pakistanse spanbestuurder by wie Haider sy paspoort die aand voor sy verdwyning aangevra het, het by navraag gesê hy is teleurgesteld dat hy nie die bestuur ingelig het nie.
“Ek kan nie raai wat in ’n speler se kop en hart aangaan nie en ons het geen idee gehad van wat hy beplan het nie,” het Inthikab aan die Khaleej Times gesê.
* Intussen het die Internasionale Krieketraad (IKR) by monde van sy uitvoerende hoof, mnr. Haroon Lorgat, aangedui dat Haider sy “volle ondersteuning” het.
Dít volg nadat Haider gister ook onthul het dat hy verlede jaar voor ’n plaaslike wedstryd tussen die Lahore Eagles en die National Bank of Pakistan, soortgelyke dreigemente ontvang het.
Dr. Mohammed Moosajee, die Suid-Afrikaanse spanbestuurder, het by navraag aan Sport24 gesê dat nog geen soortgelyke voorval in die Protea-kamp aangemeld is nie.
Bly op hoogte van al die jongste sportnuus deur Nuus24Sport op Twitter te volg.
- Sport24