Pakistan-vrouekrieketspan slaap by stadion

2013-01-29 12:26

Nieu-Delhi – Pakistan se vrouekrieketspelers sal tydens die Wêreldbeker-toernooi in Indië weens sekuriteitsredes in 'n klubhuis slaap eerder as om hotelle te gebruik, het die Internasionale krieketraad (IKR) Dinsdag gesê.

Die hele span sal in die klubhuis by die Barabati-stadion in Cuttack in die ooste van Indië bly.

"Ek kan bevestig dat die span by die Barabati-stadion sal bly," het 'n woordvoerder vir die IKR aan AFP gesê.

"Die IKR het die opsies oorweeg en na die beste beskikbare sekuriteit vir spanne gekyk en ons het die Barabati-klubhuis gekies."

Cuttack is as 'n opsie voorgestel nadat die verregse party Shiv Sena gedreig het om Pakistan se wedstryde in Moembaai, waar al die toernooi se wedstryde aanvanklik sou plaasvind, te ontwrig.

Die span sal egter steeds na Moembaai moet reis as hulle die Wêreldbeker-eindstryd haal.

Pakistan se spanbestuurder, Ayesha Ashar, het gesê die spelers is tevrede met die reëlings wat getref is.

Die span speel hul openingswedstryd Vrydag teen Australië.

Vir die jongste sportnuus volg Nuus24Sport op Twitter.

- Sapa - AFP