Pakistan-paaltjiewagter tree uit
2010-11-09 12:39
Londen - Zulqarnain Haider, die Pakistanse paaltjiewagter wat Maandag uit Doebai gevlug het nadat hy dreigemente ontvang het, het sy uittrede uit krieket aangekondig.
Haider (24) het Maandag nie saam met die res van die spelers by die Doebai internasionale stadion vir die beslissende eendagwedstryd teen Suid-Afrika opgedaag nie.
Hy het dieselfde dag nog in Londen aangekom waar hy glo ook om asiel aansoek gedoen het.
Dié paaltjiewagter het die wenlopies in die vierde eendagstryd Vrydag teen die Proteas aangeteken. Maar het Maandagoggend op sy Facebook-profiel geskryf dat hy dié span “verlaat” nadat hy skynbaar gedreig is om ’n wedstryd te “verloor”.
“leaving Pakistan cricket because get bad msg fr 1 man fr lose the match in last game,” het Haider geskryf – rofweg op dieselfde tyd as toe hy vir die laaste keer deur lede van die Proteas in die ingangsportaal van die Grand Hyatt-hotel gewaar is.
- Cricinfo