Pakistan lugtig vir Philander

2013-01-21 15:17

Johannesburg – Misbah-ul-Haq, kaptein van Pakistan se krieketspan, het gesê Vernon Philander is een van die Proteas om dop te hou tydens die toetsreeks volgende maand.

Philander is ingesluit in die Proteas se toetsgroep vir die reeks na hy die tweede toets teen Nieu-Seeland moes misloop met ‘n dyspierbesering.

“Hy is ‘n faktor met die nuwe bal en die manier waarop hy die bal kry om te swaai,” het Misbah tydens ‘n mediakonferensie in Johannesburg oor Philander gesê.

Pakistan is vierde op die IKR se toetsranglys en sal ‘n moeiliker teenstander wees as die Kiwi’s, wat albei toetse teen die Proteas met ‘n beurt verloor het.

Misbah het bygevoeg dat sy span hard gaan moet werk teen die Proteas, wat die reeks as gunstelinge begin.

“Met Hashim Amla, Jacques Kallis en Graeme Smith het hulle alles wat hulle nodig het in hul kolflys.”

“Dan het hul gehalte-boulers soos Dale Steyn, Morné Morkel en Philander. Hulle is werklik ‘n goeie span en ons gaan ons beste moet gee om enige vorm van teenstand te bied.”

– Vir die jongste sportnuus volg Nuus24Sport op Twitter.

- SAPA