Pakistan dalk gasheer vir T20
2009-09-28 09:14
Islamabad - Die Pakistanse krieketraad (PCB) beplan 'n bod om die Twintig20-wêreldtoernooi in dié land te hou met die hoop dat die sekerheidsituasie in die land oor die volgende vyf jaar sal verbeter.
"Hopelik sal die toestande in die land teen daardie tyd ideaal wees om internasionale sportgeleenthede aan te bied," het Ijaz Butt, voorsitter van die (PCB), gesê.
'n Topbeampte van die PCB sal na verwagting vandeesweek met ander krieketrade vergader terwyl hulle in Suid-Afrika is vir die Internasionale Krieketraad (IKR) se Kampioenetrofee-reeks, om hul ondersteuning vir dié bod te werf, berig The News.
Dié toernooi sou aanvanklik verlede jaar in Pakistan plaasgevind het, maar is uitgestel weens veiligheidsvrese en sou vanjaar na Sri Lanka verskuif het.
Dit is egter die reënseisoen in daardie tydperk in Colombo en daarom is besluit om die toernooi nogmaals na Suid-Afrika te skuif.
Pakistan se regte as mede-gasheer vir die 2011-Wêreldbeker is ook weggeneem ná 'n terreuraanval op Sri Lanka se toetsspan vroeër vanjaar.
Aboe Dhabi en Doebai, wat vroeër vanjaar gasheer was vir Pakistan se wedstryd teen Sri Lanka, sal weer gebruik word vir drie internasionale eendagwedstryde en twee Twintig20-wedstryde tussen Pakistan en Nieu-Seeland in November.
Die PCB het ook 'n versoek aan die IKR gerig om meer toetsreekse tussen Pakistan en Indië te reël in die volgende internasionale toerprogram (FTP).
Butt het gesê hy verwag dat die sub-kontinentale aartsvyande vier keer oor die volgende agt jaar mekaar die stryd sal aansê met Pakistan wat die opsie het om dié reeks op 'n "neutrale" plek te speel.
"Die IKR het die waarborg vir die reeks, wat elke twee jaar gehou sal word, gegee. Hulle het ook gesê dié reeks kan by 'n neutrale plek gehou word tot die sekerheidsituasie in Pakistan verbeter."
– Sapa-AP