Pakistan-afrigter gekritiseer ná reeksnederlaag
2013-02-25 15:37
Islamabad – Die voormalige kaptein van Pakistan, Rashid Latif, het hul afrigter Dav Whatmore se afrigting bevraagteken ná die span se 3-0 reeksnederlaag teen die Proteas.
“Die voorsitter, kaptein, onderkaptein en afrigter moet almal verantwoordelik gehou word vir die uitslae en dit moet begin by die afrigter,” het Latif Maandag gesê.
Pakistan het Sondag in Centurion die derde toets met ‘n beurt en 18 lopies verloor. In die eerste toets op Wanderers het die span met ‘n beurt en 211 lopies verloor ná hulle vir 49 in hul eerste beurt uitgeboul was.
Die span het ook op Nuweland die tweede toets met vier paaltjies verloor, ten spyte van Younis Khan en Asad Shafiq se honderdtalle en Saeed Ajmal se 10 paaltjies.
“Ek het regtig nie verwag dat ons al drie toetse sou verloor nie, maar as jy kyk hoe ons kolwers op die kolfblaaie misluk het, wys dit dat daar geen huiswerk gedoen is nie,” het Latif gesê.
“Vir hoe lank gaan ons kla dat ons nie op vinnige blaai kan kolf nie?”
“Dit is alles dom verskonings. Krieket is ‘n professionele sport en as jy vir jou nasionale span gekies word, beteken dit jy is die beste wat die beste in die wêreld moet aandurf.”
“Ons het net een keer die 300 lopie-kerf verby gesteek in ses beurte, wat het die afrigter gedoen?”
Pakistan se twee T20-wedstryde teen die Proteas begin op 1 Maart in Durban en die eendagreeks sal op 10 Maart afskop.
Vir die jongste sportnuus volg Nuus24Sport op Twitter.
- AP
