Onoorwonne Warriors sal Lions deeglik toets
2010-02-12 08:27
Christo Buchner
Johannesburg - Die nuwe besem in Lions-krieket vee toe wel skoon.
Met Thami Tsolekile (kaptein) aan die stuur in die plek van Neil McKenzie, het die Lions Woensdag hul eerste sege in die Pro20-krieketreeks behaal deur die Titans op SuperSportpark in Centurion hul eerste nederlaag toe te dien.
Die Lions het dié wedstryd met vier paaltjies gewen
Die Lions wil vanaand hier op die Wanderers teen die Warriors wys dit was nie bloot net ’n gelukskoot nie en dat die wenmomentum behoue kan bly.
Die Oos-Kapenaars is die enigste onoorwonne span in die reeks en nadat hulle ook onlangs gekroon is as die eendag-kampioene, ry Davey Jacobs-hulle op die kruin van die golf.
Een van die twee spanne gaan egter nie vanaand die vreugdevure laat brand nie.
Die Lions het ’n besielende vertoning teen die Titans gelewer.
Dit was veral Dane Vilas se blitsige 53 lopies van net 37 balle af en die vurige boulwerk van Ethan O’Reilly (3/27) wat uitgestaan het.
Die sterbelaaide Warriors sal ’n deeglike toets wees vir die Lions se nuutgevonde selfvertroue.
Nadat die Dolphins eergisteraand in Durban teen die Diamond Eagles die derde agtereenvolgende keer in dié reeks slae gekry het, lyk dit of dit neusie verby is vir ’n plek in die halfeindronde.
Die Eagles het die Dolphins met 13 lopies geklop om hul aanspraak te laat voortleef.
Met slegs vier ligapunte wat die Warriors (8) in die boonste plek van die Lions (4) in die tweede laaste plek skei, gaan dit ’n gespook afgee om plekke in die halfeindronde.
- Die Burger