Ondersoek oor Hansie weer geopen
2011-11-15 11:44
Nieu-Delhi – Die ondersoek na wedstrydknoeiery waarby Hansie Cronjé betrokke was, sal heropen word, het die Indiese koerant Deccan Chronicle Dinsdag berig.
Dié besluit is na bewering deur Indiese regeringsamptenare geneem kort ná drie krieketspelers van Pakistan in die Verenigde Koninkryk tronkstraf ontvang het vir hulle betrokkenheid by wedstrydknoeiery.
Die ondersoek sal glo heropen word ná 'n brief deur Britse owerhede aan die Indiese polisie nuwe besonderhede aan die lig gebring het.
Die betrokke brief is geskrywe in antwoord op 'n navraag wat in 2007 deur die Delhi-polisie aan Britse owerhede gestuur is oor 'n sleutelgetuie in die saak, die Londense beroepswedder Sanjiv Chawla.
Die Britse owerhede het in dié skrywe besonderhede gegee wat volgens die polisie in Delhi 'n verdere ondersoek regverdig.
Die polisie sal binnekort 'n verslag aan 'n plaaslike hof stuur om owerhede te verwittig dat die ondersoek weer geopen sal word.
Cronjé het as kaptein van Suid-Afrika se nasionale krieketspan uitgetree ná aantygings oor wedstrydknoeiery in 1999 die ronde begin doen het.
Die polisie in Delhi het selfoongesprekke van Cronje onderskep. Dit het egter aan die lig gekom dat dié selfoon behoort het aan die beroepswedder Rajesh Kalra. Cronjé het die selfoon gebruik om met verskeie mense in Moembaai en Nieu-Delhi te praat.
Cronjé is in 2002 in 'n vliegongeluk in George dood.
– Lees hier meer.
– Vir die jongste sportnuus, volg Nuus24Sport op Twitter.