Nou wil Blake teen Bolt boul

2012-08-16 11:32

Sydney – Die Sydney Sixers is hoopvol om Yohan Blake in hul span vir Australië se plaaslike twintig20-liga te hê ná die nuus dat Usain Bolt dalk speelkans vir die Melbourne Stars gaan kry.

Blake en Bolt is albei krieketmal en die Sixers se uitvoerende hoof, Stuart Clark, het gesê hy wil graag 'n kragmeting tussen die wêreld se twee vinnigste mans op die krieketveld sien.

Vroeër die week het die krieketlegende Shane Warne onthul dat hy besig is met 'n veldtog om Bolt na Melbourne te bring en dat onderhandelinge met die Melbourne Stars, Warne se klub, tans onderweg is.

Volgens die Telegraph het Blake onlangs onthul dat dit sy droom is om krieket te speel en het hy dié sport as sy eerste liefde bo atletiek beskryf.

"Ek sal eers na beelmateriaal moet kyk om te sien hoe hy boul, maar Blake beweer hy kan 'n aflewering teen 145 km/h stuur. Daar is nie baie mense in die wêreld wat dit kan doen nie," het Clark gesê. 

Die seisoen begin op 7 Desember met die eindstryd wat op 19 Januarie gespeel word.

Volg Nuus24Sport op Twitter.

- Sapa - AP