Nóg reën, besering laat SL kopkrap
2011-12-12 10:36
Johannesburg – Reën het Sondag wéér die Sri Lankaanse krieketspan se voorbereiding vir vandeesweek se eerste toets teen Suid-Afrika in die wiele gery.
Die besoekers kon vir net meer as 50 boulbeurte kolf op die laaste dag van hul oefenwedstryd teen ’n nasionale uitnodigingspan op Willowmoorepark in Benoni.
Spel is kort voor 16:00 afgelas, met Tillakaratne Dilshan se span op ’n stewige 207/3 in 52.3 boulbeurte nadat hy vroeër die tuisspan se laaste vier eerstebeurt-paaltjies vir net 34 lopies platgetrek het.
Tharanga Paranavitana (100) se 22ste eersterangse honderdtal en ’n haastige 74 deur Dilshan sal die besoekers effens beter laat slaap voordat die eerste van drie toetswedstryde Donderdag in Centurion begin.
Dilshan het laasweek, kort ná die toerspan se aankoms in die land, onderstreep hoe belangrik dié kragmeting sou wees om die span se sukkelende kolwers weer op dreef te kry.
Dilshan-hullehetonlangs bloedneus gekry in die toetsreeks teen Pakistan nadat hulle vroeër vanjaar ook teen Engeland en Australië vasgeval het.
MahelaJayawardene,saam met Kumar Sangakkara die Sri Lankane se groot kolfhoop, is Sondag vir net 26 deur die veelsydige David Wiese (1/32) uitgehaal.
Vroeër het Farhaan Behardien, wat die Suid-Afrikaners se kolfbeurt op 323/6 saam met Wiese hervat het, die vyfde kolwer geword wat ’n vyftigtal in dié beurt aanteken.
Hy is egter kort daarna vir 52 deur Dilhara Fernando (4/76) skoongeboul.
Hardus Viljoen (0), Wiese (12) en Paul Harris (12) kon net ’n verdere 14 lopies byvoeg voordat húl beurte deur onderskeidelik Rangana Herath (3/58), Fernando en Ajantha Mendis (2/142) beëindig is.
Dié litte-losmaker kan die toerspan boonop duur te staan kom omdat Nuwan Pradeep die veld eergister met ’n dyspierbesering moes verlaat nadat hy net 10 aflewerings kon afstuur.
Dié 25-jarige snelbouler was ’n seker keuse om die boulwerk op SuperSportpark teen Suid-Afrika te begin nadat Suraj Lakmal kort voor die toer óók op die krukkelys beland het en Lasith Malinga onlangs sy uittrede uit toetskrieket aangekondig het.
Dit is nou onwaarskynlik dat Pradeep betyds sal herstel vir die Centurion-stryd.
Dit beteken dat die boul-las op Fernando selfs groter sal wees en dat die Sri Lankane straks genoop sal word om met albei draaiboulers – Herath én Mendis – te volhard.
– Sport24
– Bly op hoogte van al die jongste sportnuus deur Nuus24Sport op Twitter te volg