Nog 3 glo vas oor ‘knoeiery’
2010-09-01 08:03
Johannesburg - Krieket se nuutste knoei-sage het Dinsdag verder uitgekring, toe nog drie mense in hegtenis geneem is in verband met die beweerde omkopery van spelers tydens die laaste toets tussen Pakistan en Engeland.
Vier ander vooraanstaande spelers het ook erken dat hulle onlangs deur ’n beroepswedder genader is.
Dis vermoedelik dieselfde man wat vroeër deur Scotland Yard aangekeer is weens beweerde ongerymdhede tydens dié wedstryd, wat die tuisspan Sondag met ’n beurt en 225 lopies gewen het.
Salman Butt, die Pakistanse kaptein, en twee van sy snelboulers, Mohammad Asif en Mohammad Amir, word sedert die naweek ondervra nadat News of the World bandopnames beskikbaar gestel het waarop ’n beroepswedder, Mazhar Majeed, spog dat hy Asif en Amir omgekoop het om opsetlik foutballe af te stuur.
Terwyl hul spanmaats in Taunton agter slot en grendel voorberei vir die eerste kitswedstryd teen die Engelse, sal dié drie vandag terugkeer na Londen.
Hulle sal met Pakistanse krieketbase en lede van dié land se intelligensiediens vergader.
Britse doeane-beamptes het gister bevestig dat drie mense, twee mans en ’n vrou van Londen, aangekeer is “as deel van ’n ondersoek na geldwassery”.
Terselfdertyd het vier Australiese spelers – Shane Watson, Brad Haddin, Brett Lee en Mitchell Johnson – gister aan cricinfo.com onthul dat hulle tydens verlede jaar se toer na Engeland ook deur ’n beroepswedder, vermoedelik Majeed, genader is.
Dié spelers het die voorvalle by hul spanbestuurder, Steve Bernard, aangemeld, wat dit na die Internasionale Krieketraad (IKR) verwys het.
- Haroon Lorgat, uitvoerende hoof van die IKR, het gister in ’n verklaring volgehou dat die kitswedstryde sal voortgaan – ondanks enorme druk om die res van die toer af te las.
“Die waardigheid van die spel is die heel belangrikste en ons sal nie enige korrupsie duld nie,” het hy gesê.
“Tog moet die feite eers vasgestel word met behulp van ’n deeglike ondersoek.
“Eers daarna kan die IKR toesien dat die gepaste straf uitgedeel word aan enige speler of spelers wat hulle aan knoeiery skuldig maak.”
Bly op hoogte van al die jongste sportnuus deur Nuus24Sport op Twitter te volg.
- Sapa - AFP