Nieu-Seeland almal uit vir 45

2013-01-02 12:38

Kaapstad – Die Proteas se snelboulers het amok gemaak op Nuweland deur Nieu-Seeland in hulle eerste kolfbeurt tot slegs 45 lopies te beperk op dag een van die eerste toets.

Vernon Philander het vyf paaltjies binne die eerste 45 minute van spel laat kantel. Hy het in dié tyd slegs sewe lopies afgestaan.

Morné Morkel het hom goed bygestaan en het drie paaltjies vir 14 lopies laat kantel.

Dale Steyn, wat vroeër die vierde Suid-Afrikaner geword het om 300 toetspaaltjies te neem, het die laaste paaltjie geneem toe hy vir Daniel Flynn van sy eie boulwerk uitgevang het. Steyn het slegs 18 lopies afgestaan vir sy twee paaltjies.

Kane Williamson het die hoogste telling van al die Kiwi's gemaak. Hy het 13 lopies aangeteken voor Philander hom been-voor-paaltjie betrap het.

– Vir die jongste sportnuus volg Nuus24Sport op Twitter.