Mylpaal-toets vir Proteas
2012-11-29 13:52
Johannesburg – Die Suid-Afrikaanse toetsspan speel Vrydag hul 200ste toets sedert die Proteas se hertoelating tot die spel.
Die derde toets teen Australië in Perth begin op dié dag.
"Dit is 'n merkwaardige oomblik vir Krieket Suid-Afrika en veral vir die 79 krieketspelers wat die Proteas-embleem in die toetsarena gedra het," het Jacques Faul, waarnemende hoof- uitvoerende beampte van KSA, gesê.
"Dit is baie gepas dat dit gebeur in 'n wedstryd wat daar so baie op die spel is en waar daar sulke vurige afwagting is in die krieketwêreld, met die nr.1-posisie op die toetskrieketranglys wat tussen ons en Australië op die spel is.
"Dit voel soos gister wat Kepler Wessels die Proteas vir die eerste toets in die Wes-Indiese Eilande gelei het – 'n wedstryd waarin Andrew Hudson, huidige sameroeper van die keurkomitee, 'n honderdtal in sy toetsdebuut aangeteken het."
Faul het gesê daar was baie hoogtepunte sedert die eerste toets ná hertoelating in 1992, met die Proteas se toetskaptein, Graeme Smith, wat die kaptein is wat die meeste toetse in die geskiedenis gespeel het.
Suid-Afrika het meer toetse gewen as verloor teen elke toetsnasie, behalwe Australië, het Faul gesê.
In die Proteas se 100ste toets sedert hertoelating het Smith met 151, 'n rekordbeurt van 368 vir die eerste paaltjie in 2003 op Nuweland saam met Herchelle Gibbs aangeteken.
Smith lei Suid-Afrika vir die 96ste keer wanneer die Proteas se toets in Perth begin.
Suid-Afrika se ander toetskapteine en toetse as kaptein: Hansie Cronje (53), Shaun Pollock (26), Kepler Wessels (16), Mark Boucher (4), Jacques Kallis (2), Ashwell Prince (2), Gary Kirsten (1).
– Volg Nuus24Sport op Twitter
- SAPA
