Minister gedreig om ‘uit krieket-ding te bly’
2011-10-18 10:08
Johannesburg – Fikile Mbalula, minister van sport, het dreigoproepe ontvang oor sy ingryping in Suid-Afrikaanse krieket se bonusskandaal.
Mbalula, wat die naweek aangekondig het dat ’n komitee aangestel gaan word om opnuut die bevindings van ’n forensiese ondersoek na Gerald Majola te bestudeer, het Maandag onthul dat hy deur “invloedryke mense” gedreig is om “uit die krieket-ding te bly”.
“Ek het oproepe ontvang van invloedryke mense wat sê: ‘Bly uit die krieket-ding uit en moenie betrokke raak nie. Los KSA (Krieket Suid-Afrika) uit.’
“Ek sal nie gedreig word nie. Ek was in die polisie en niemand kan aan my vat nie.”
Volgens Mbalula het hy besluit om toe te tree tot dié sage, wat KSA reeds sedert Augustus verlede jaar treiter, aangesien dié beheerliggaam “gewys het dat hy nie sy eie probleme kan oplos nie”.
Dít ondanks die feit dat dr. Mtutuzeli Nyoka die naweek die trekpas gekry het as KSA se president tydens ’n spesiale algemene jaarvergadering van sy ledeforum by die O.R. Tambo-lughawe.
Nyoka was die afgelope 16 maande in ’n smerige tweestryd met Majola gewikkel oor die betaling van R4,7 miljoen se ongemagtigde bonusse aan dié uitvoerende hoof en sowat 40 ander KSA-werknemers.
Die bonusse is nooit deur KSA se uitvoerende raad óf finansiële en besoldigingskomitee goedgekeur nie.
“Ons gaan ingryp, want net mooi niks is opgelos nie.
“Ons krieket is besig om agteruit te gaan, ons het nie borge nie, daar is geen idee van hoe om te werk te gaan nie en dit alles weens ’n raad wat onderling stry.”
Volgens hom sal ’n komitee, onder leiding van ’n oudregter, vandeesweek aangestel word en sal die ondersoek “hopelik voor Kersfees” afgehandel wees.
Die komitee sal ’n verslag bestudeer met die aanbevelings van adv. Azhar Bham SC, wat vroeër vanjaar aangestel is om te besluit oor optrede teen Majola nadat ’n twee maande lange forensiese ondersoek deur KPMG bevind het dat hy wel die Maatskappywet oortree het.
Majola is gevolglik net “ernstig berispe” deur KSA.
Vir die jongste sportnuus volg Nuus24Sport op Twitter.
– Sport24